افْلاَشْ :

افْلاَشْ :

امْشَ عَلّيهْ اُذاكْ ابْلَدْ   

يَغَيْرْ امْشَ ماهْ اعْلَ عارْ

جَ لَجْدِرْ لَخْظَرْ خاطرْ بَعْدْ   

يَعْرَفْ لواسِ لِلْخطارْ

أحمدو ولد أبنوا بتاريخ 21 / 04 / 2013م

أبعاد وتجليات رحيله

الحمد لله والصلاة والسلام علي رسول الله

وبعد :

فإنه لا يسعني وأنا أعيش معكم حدث رحيل الفقيد المغفور له "عليه" بكل أبعاد وتجليات رحيله : الروحية ، والنفسية والاجتماعية ، والانسانية ...إلخ. إلا أن أري أن المنظومة العلائقية  التي تربينا وترعرعنا جميعا في أحضانها الدافئة وظلالها الوارفة وأواصرها الحميمية ووشائجها الناعمة القوية تشاطرنا حدث رحيل الفقيد المغفور له   "عليه" تغمده الله برحمته وأسكنه فسيح جناته ،

"عليه" الذي كان خير خلف لخير سلف في كل مجال من مجالات الحياة ، ولا غرو ، فقد أخذ علي نفسه هذا أن يصون ويعزز وينمي ويطور هذه المنظومة العلائقية المتوارثة جيلا بعد جيل فور تسلمه لمهامه ، كفرد فاعل في المجتمع عبر مسيرته المظفرة ، فأنجز حر ما وعد ، حتى أصبح الكل يعتبره أبا له ، طيب الله مثواه ، رحم الله السلف وبارك في الخلف .

إخوتي أخواتي الأعزاء : أجارنا الله وإياكم في مصيبتنا جميعا وألهمنا وإياكم الصبر والسلوان.

إنا لله وإنا إليه راجعون.

هذا ولم يبق لي إلا أن يقول لسان حالي :

الرَّحْمَ والْغُفرانْ اَكْرَانْ    لِلِّ عَلَّ فاتْ السُّبْحانْ

مَقامُ فِ الْكُرْمْ اُلحْسانْ    واسْتفْتِ والْخوْفْ اَبَدِيهْ

امْنْ اللهْ اُتوفْ الْمَنَّانْ   والْغَيْرُ ماغادِ شِ فيهْ

امْشَ شورْ الغفورْ اِبانْ    اخْلَعَنَّ عنَّ عَلِّيهْ

يلِّ يعْطيهْ امْنْ الرّضْوانْ   وجَّنَّ كِدْ اللاَّيِقْ بيهْ

وِباركْ فِلِّ مِنْ لَعْيالْ   خَلَّ وِانَزَّلْ حَتَّ فيهْ

الْبَرْكَ وِاحَقَّقْ لَمالْ    فَلِّ خَلَّ وَ الِّ يَبْغيهْ

أحمد ولد بوبيه   بتاريخ 21 / 04 / 2013م

في رثاء المغفور له علي ولد الكوري الملقب "عَلّيهْ"

في رثاء المغفور له علي ولد الكوري الملقب "عَلّيهْ"

عَلِيِنْ فاتْ اَللهْ اَعْطاهْ    اَنَّ ذَ الرَّبْ الِّ ناشِيهْ

وَمْشَ يَلْطفْ بِينَ مُراهْ    اُ لا لاهِ يَخْلعنَ مَشيهْ

بيهْ الْ كانْ الاَّ عنْدْ اللهْ   اُهوَّ زادْ الِّ ماشِ بيهْ

بيهْ الِّ ذّ الْحيْ القَيومْ   واسَ لَجْلْ اَعْلينَ محتومْ

اَعْلَ لَنْفاسْ اُكِيفَتْ نَوْمْ  مُحَمَّدْ صَلَّ اللهْ اَعْلِيهْ

ما عَنْهَ وُلاَّدَمْ مَلْمُومْ     ذَ كامِلْ بِالْمَوْتْ اِمْساوِيهْ

وِالصَّنْعْ افْلَرْحامْ الْمعْلُومْ    فيهْ اِعَرْبِ وَالِّ اعَسْرِيهْ

وِالِّ افَضَّلْ كَوْمْ اَعْلَ كَوْمْ   بِالرِّزْقْ الِّ رازِقْنَ بيهْ

وِالِّ يَخْلَكْ كِيفْ الْمَرْحومْ   ولْ الْكَورِ وخْلِكْ يَبْغِيهْ

مارتْ عَنُّ يَبْغِيهْ الْيَوْمْ   مَرَاتْ السَّعادَ ذُ الْفِيهْ

الدِّينْ اُلمْرُوَّ لَثْنَيْنْ    اُحسْنْ الْخُلْقْ اُمتْنْ الْيَقِينْ

اُمتْنْ الْعَهْدْ الْفِيهْ امْحَقِّينْ    وَالتَّعْدالْ الصَّانعْ فَيْدِيهْ

اُحفْظْ الْقُرآنْ اُفَرْضْ الْعَيْنْ    واعْلَ هاذَ رَبُّ هادِيهْ

اُلا كَطْ اعْبَدْ لادَمِيِّينْ    والِّ يَعْرَفْ يَعْبَدْ عَرْبِيهْ

واهْلْ الشَّاهدْ ذُ فُرْ اكْرانْ    زَكْلُ عَيْنْ امْنْ اَفْضَلْ لَعْيانْ

عَلِيِنْ يَعطيهْ الْغُفرانْ    وَالرَّحمَ وَاللهْ اِجازيهْ

الشّجاعْ الِّ ما يلْيانْ    الْحدْ اَعْكدْ فيهْ اَنْواصيهْ

اُعَنْدْ اَمْنَيْنْ الْيخْلكْ مَيدانْ    اَفْلكلامْ اُيَتكَلّمْ فيهْ

ما لاهِ يتْكَلّمْ قَرَّانْ   فَمنَيْنْ اَلْ يتْكلّمْ عَلِّيهْ

حسّادُ ظَحْكُ ذَ لَوَانْ   فَمنَيْنْ الِّ سَمْعُ مَشيهْ

يا حسّادُ ذاكْ الِّ كان   افعَلِّيهْ اليَوْمْ اَراعِيهْ

محمد سالم حَيْ اِبانْ   كِيفِتْ عَلّيهْ اَلِّ اِعَلّيهْ

اُعَلّيهْ اَرَاهُوَ عثمانْ   اُناصرْ عَلّيهْ الِّ اِجازيهْ

اُ ميلود اصَّ ماهِ تعْيانْ   كيفِتْ عَلّيهْ اَلاَّ شُوفيهْ

اُعَلّيهْ المختار الحَسَانْ  اُ بَابَ عَلّيهْ اُذَ سَمْعيهْ

المختار ولد من ولد حيمد بتاريخ 21 / 04 / 2013م

مراثي المغفور له علي ولد الكوري "عليه"

مراثي المغفور له الشيخ الفاضل الكريم ابن الكرماء

علي ولد الكوري "عليه"

لعْمُرْ زينْ اُيسْلكْ مُلاهْ                منْ شِ يجْرحْ وِظرْ الْجاهْ

وللَّ ينْكصْ منْ دينْ اللهْ               هاذُ سالكْ منْهمْ عَلّيهْ

يِرْضِ عنُّ مكْثرْ مزَّاهْ                  كريمْ اُشُجاعْ اُنَزيهْ

يَلْطفْ بِينَ نَحنَ مُراهْ                   اُهوَّ مُرانَ تَلطفْ بيهْ

وَتْباركْ فَوْلادُ لَعْيانْ                    وَوْلادْ اَخّوتُ وَهاليهْ

وَتْجازيهُمْ عنَّ بَحْسانْ                  اُهوَّ عنَّ زادْ اتْجازِيهْ

محمد ولد الغوث

بتاريخ 21 / 04 / 2013م

امْشَ وِركَّكْ تِزِكيهْ       أنَّ يَلطفْ بِينَ عَلّيهْ

عنَّ وِركَّكْ لَهالِيهْ          تِزِكِيهْ أمَّلِّ لَخْرَينْ

راجلْ قَبيلَ ذيكْ أعْطيهْ      فيهَ خطْمَ بالصِّيتْ الزَّينْ

مُهابْ اُخالكْ عالمْ بيهْ       ذاكْ اُذاكْ اُشُجاعْ امْتينْ

ساعتْ لَكْسَ وَافْطنْ عنْ فيهْ       اللِّينْ امَّلِّ وقتْ اللِّينْ

وَالدِّينْ اعْطاهْ اَصَّ عَرْبيهْ       زَيْنْ الْحمدُ للهْ الدِّينْ

اَلِّ رَبَّ لَعْيالْ اعْليهْ           اِجازِيهْ   اُمَتَّنْ يَقينْ

لَعْيالْ اَلاَّ تَمْ امْكانيهْ     بَالدِّينْ اَفْرادْ  اُمجْتَمْعينْ

يَعْطيهْ الرَّحمَ وِعَلِّيهْ     فَجَّنَّ فَعْلَ عِلِّيِّينْ

وَاتْخَلِّ لوْلادْ اُلمْناتْ     وِباركْ فيهُمْ فُرْ اِلَيْنْ

اِتَمُّ زادْ اعْلَ وطْياتْ   عَلِّيهْ الِّ خاظُ حيِّينْ

المختار ولد الكوري بتاريخ 21 / 04 / 2013م

فَ الدَّنْيَ عَلاَّهْ الْمَعْبودْ     عَلِّيهْ اَلَّ تَمْ امْعَلِّيهْ

وَالْيَوْمْ اَلاَّ نَخْتَيرْ اِعُودْ      مَقَامُ مَقَامِ عَلِّيهْ

أحمدو ولد الكوري    بتاريخ 21 / 04 / 2013م